Jeshi la Polisi Mkoani Geita linawashikilia watu watatu kwa tuhuma za kutapeli wakijifanya maafisa kutoka serikalini.
Watu hao waliotambulika kwa majina ya Emmanuel John(38), Stanley George (34), na Musa Nasoro (35) wakazi wa Dar es salaam kwa tuhuma za kuwatapeli viongozi mbalimbali wa serikali wakijifanya ni maafisa kutoka ikulu.
Kamanda wa Jeshi la polisi Mkoani Geita Kamishina Msaidizi Henry Mwaibambe amesema watu hao wamekamatwa kwa kujifanya maafisa wa serikali na kuwapigia viongozi mbalimbali wa serikali kwa lengo la kutaka kuwatapeli.
Mwaibambe amesema Watuhumiwa hao walikuwa wanawapigia viongozi mbalimbali wa Serikali na kujitambulisha kuwa ni wasaidizi kutoka ofisi ya Rais na kuwaeleza kuwa Rais anafurahishwa na jinsi wanavyotenda kazi.
