Na: Stella Kessy.
MABINGWA watetezi Simba leo wametinga nusu Fainali ya Michuano ya Kombe la Azam Sport Federation (ASFC kwa kuichapa mabao 4-0 Timu ya Pamba FC kutoka Mwanza Mchezo uliopigwa uwanja wa Benjamin Mkapa jijini Dar es Salaam.
Katika mtanange huo Simba walionekana kutawala mchezo na bao la kwanza lilifungwa na Peter Banda dakika ya 45 kipindi cha kwanza baada ya kupokea pasi ya Rally Bwalya bao ambalo lilidumu katika kipindi cha kwanza.
Huku katika Kipindi cha pili kilianza kwa timu zote kufanya mabadiliko huku Simba ikinufaika zaidi na mabadiliko hayo.
Hata hivyo katika dakika ya 47 Kibu Denis aliwanyanyua mashabiki wa Simba baada ya kupokea krosi ya Mohamed Hussein,na mabao mawili walitupiwa nyavuni na Yusuph Mhilu dakika ya 52 na 88.
Kwa ushindi huo Simba watakutana na Yanga Nusu Fainali ya Michuano hiyo huku Azam FC watakutana na Coastal Union.
