Timu ya wekundu wa msimbazi Simba SC imeendeleza kichapo kwa kuitungua timu ya Ruvu Shooting kwa jumla ya mabao 4-0.
Katika mchezo huo uliopigwa leo Novemba 19,2022 katika Dimba la Mkapa Jijini Dar es Salaam, timu ya Simba SC ilipata mabao yake matatu katika kipindi cha kwanza cha mchezo huo mbapo magoli mawili yakifungwa na ‘Papaa’ John Bocco katika dakika ya 3, na 17 na goli la tatu likifungwa na Shomari Kapombe katika dakika ya 35 ya kipindi cha kwanza ya mchezo huo.
Kipindi cha pili John Bocco alifaniliwa kupiga hat-trick yake ya kwanza kwa kuipatia Simba bao la nne katika dakika ya 68 ya Kipindi cha pili kwa kumtambuka beki wa kati wa Ruvu Shooting na kupeleka mpira wavuni.
Kufuatia ushindi huo Simba wanakwenda kileleni na kuongoza Ligi ya NBC akiwa na jumla ya alama 27 na uwiano wa magoli 19 ya kufunga na kufungwa, huku Mabingwa watetezi timu ya Yanga ikishika nafasi ya pili ya msimamo wa Ligi hiyo ikiwa na jumla ya alama 26 na uwiano wa magoli 13 ya kufunga na kufungwa.
