KIKOSI cha Simba leo kinashuka katika uwanja wa Novemba 11 saa 12 jioni kukabiliana na Premiero De Agosto katika mchezo wa hatua ya kwanza ligi ya mabingwa Afrika.
Akizungumza Kabla ya mchezo huu kocha mkuu wa Kikosi cha Simba Juma Mgunda ameweka wazi kuwa amewafuatilia wapinzani wao na kuona ubora wake na mapungufu yao ambayo watayatumia ili kupata ushindi.
Ameongeza kuwa baada ya kuwaona wapinzani wamefanyia kazi mapungufu yao pamoja na wachezaji wake ili kupambana na kupata matokeo mazuri ugenini.
“Tunacheza ugenini , tunajua Utakuwa mchezo mgumu kwakuwa wenzetu watakuwa na faida ya mashabiki lakini tumewaona na tutatumia mapungufu yao kuwadhuru na kujikinga na ubora wao “ amesema.
Kwa upande wa Nahodha wa Kikosi cha Simba John Bocco amesema kuwa ingawa wanauzoefu wa kutosha lakini wanashuka dimbani na kuwaheshimu wapinzani wao na badala watapambana kuhakikisha wanafanya vyema ugenini.
“Maandalizi yamekamilika, walimu wetu wamejitahidi kutuelekeza kitu ambacho tunapaswa kwenda kufanya na sisi wachezaji tupo tayari kukitekeleza uwanjani” amesema
