Wakala wa Usajili wa Biashara na Leseni (BRELA) imewahimiza wafanyabiashara katika eneo la Buguruni, Wilaya ya Ilala, kurasimisha biashara zao ili kuwa na utofauti kati ya biashara moja na nyingine.
Wito huo umetolewa leo tarehe 26 Julai, 2023 na Afisa Usajii wa BRELA Bw. Yusuf Mwasakafyuka wakati wa ukaguzi elimishi kwa wafanyabiashara waliokuwa wakipata elimu kuhusu huduma zinazotolewa na BRELA maeneo ya Buguruni kwa Mnyamani.
Akizungumza na wafanyabiashara hao Bw. Mwasakafyuka amesema zoezi hilo limelenga katika kutoa elimu na kuhimiza kuhusu umuhimu wa kurasimisha biashara.
“Lengo kuu ni kuwapa elimu wafanyabiashara ambao bado hawajasajili biashara zao na wale ambao tayari wamesajili ili watekeleze matakwa ya kisheria baada ya usajili”, amesema Bw. Mwasakafyuka.
Pia ametumia fursa hiyo kuwasikiliza na kupokea changamoto wanazokumbana nazo wakati wa kupata huduma za BRELA kupitia mfumo wa usajili kwa njia ya mtandao .
Ukaguzi huu elimishi utaendelea kufanyika katika wilaya zote za Dar es Salaam ambazo ni Ilala, Kinondoni, Temeke, Ubungo na Kigamboni.
