WAZIRI MKUU, Kassim Majaliwa amezitaka taasisi za dini nchini kuendelea kuwahamasisha waumini wake kudumisha amani na kushiriki katika shughuli za maendeleo.
Ameyasema hayo leo (Jumanne, Januari 14, 2025) alipokutana na viongozi wa Kitaifa wa Jumuiya ya Kiislam ya Ahmadiyya ofisi ndogo ya Waziri Mkuu Oysterbay jijini Dar es Salaam. Viongozi hao wapya wa jumuiya hiyo walikwenda kwa ajili ya kijitambulisha.
“Fanyeni kazi kwa uhuru na wala msiwe na mashaka. Wahamasisheni Watanzania washiriki katika shughuli za kimaendeleo.” Pia amewashauri viongozi hao wabuni miradi ya kiuchumi kwani Tanzania kuna fursa nyingi za kimaendeleo.”
Kadhalika, Mheshimiwa Majaliwa ameipongeza jumuiya hiyo kwa uwekezaji iliofanyika katika sekta mbalimbali zikiwemo afya na elimu ambapo ameahidi kuwa Serikali itaendelea kuwapa ushirikiano katika jitihada zao hizo.
Amesema Serikali kwa upande wake inathamini na kutambua mchango mkubwa unaofanywa na taasisi mbalimbali za kidini nchini ikiwemo Jumuiya ya Kiislam ya Ahmadiyya, hivyo amewahakikishia ushirikiano katika utekelezaji wa majukumu yao.
Kwa upande wake, Amiri na Mbashiri Mkuu wa Jumuiya ya Kiislamu ya Ahmadiyya, Sheikh, Khawaja Muzaffar Ahmad ameipongeza Serikali ya Tanzania kwa kazi nzuri inayofanywa katika kuwahudumia Watanzania. “Nimeishi Tanzania kwa zaidi ya miaka 20, ni nchi nzuri hongereni kwa kazi nzuri mnazozifanya.”
Naye, Naibu Amiri, Sheikh Abdulrahman Mohammed Ame ametumia fursa hiyo kuishukuru Serikali kwa kuwajali wananchi wake na amemuahidi Waziri Mkuu kwamba taasisi yao iko tayari kushirikiana na Serikali katika masuala mbalimbali yakiwemo ya uwekezaji.
Baadae Mchana, Waziri Mkuu Kassim Majaliwa alikutana na Naibu Waziri wa Mambo ya Nje wa Japan Bw. Hisayuki Fujii na ujumbe wake kwenye Ofisi ndogo ya Waziri Mkuu Magogoni Jijini Dar es Salaam.
Katika mazungumzo yao, Waziri Mkuu amemweleza Fujii kuwa Tanzania imeendelea kuweka mazingira rafiki ya kufanya uwekezaji ambayo yanawawezesha wawekezaji kunufaika na shughuli zao.
“Serikali inajivunia ushirikiano mkubwa uliopo kati ya Tanzania na Japan, licha ya yote nchi yetu sasa imeweka mazingira mazuri sana ya uwekezaji Nchini nitumie fursa hii kuwakaribisha kuja kuwekeza Tanzania”
Kwa Upande wake Bw. Hisayuki Fujii, amesema Japan itaendelea kuunga Mkono Ushirikiano uliopo baina ya Tanzania na Japan na kuendelea kuleta wawekezaji zaidi katika sekta ya madini, Nishati na Teknolijia.
