Baadhi ya wakazi wa kijiji cha Tanga Halmashauri ya Mji Mbinga mkoani Ruvuma wakiwa katika foleni kwa ajili ya kupata huduma ya uchunguzi wa vimelea vya ugonjwa wa kifua kikuu wakati wa kampeni ya kupambana na ugonjwa huo iliyofanywa na Serikali kwa kushirikiana na wadau wa maendeleo Shirika la MDH-Amref Health Africa wilayani Mbinga.
Mratibu wa kifua kikuu na ukoma wa Halmashauri ya Mji Mbinga Dkt Wenceslaus Socky kushoto akimsikiliza mkazi wa Mtaa wa Bethelehem Sipilian Samlongo aliyefika kufanya uchunguzi wa afya yake wakati wa kampeni ya mapambano dhidi ya ugonjwa wa kifua kikuu iliyofanyika kwa siku mbili katika Halmashauri ya Mji Mbinga.
Muhudumu wa Afya ngazi ya jamii(CHW) Gerold Komba akitoa elimu ya ugonjwa wa kifua kikuu kwa baadhi ya watoto wa kijiji cha Tanga Halmashauri ya Mji Mbinga waliofika katika kampeni ya uchunguzi wa ugonjwa huo iliyofanyika katika kijiji hicho.
Picha na Muhidin Amri
Na: Muhidin Amri,, Mbinga
BAADHI ya wakazi wa Halmashauri ya Mji Mbinga mkoani Ruvuma,wameiomba Serikali kupitia wizara ya afya kuendelea kutoa huduma ya upimaji wa vimelea vya ugonjwa wa kifua kikuu kwa watu waishio vijijini kutokana na maeneo hayo kutofikiwa kiurahisi na wataalam.
Wametoa ombi hilo kwa nyakati tofauti, wakati wa kampeni ya uchunguzi wa kifua kikuu inayofanywa na wizara ya afya kwa kushirikiana na wadau wa maendeleo shirika lisilo la kiserikali la MDH-Amref Health Africa.
Kosmas Kumburu mkazi wa kijiji cha Litembo alisema,licha ya kazi nzuri inayofanywa na wataalam wa kitengo cha kifua kikuu kuibua watu wanaougua ugonjwa huo,hata hivyo kampeni hizo hazitakuwa na tija kama zitafanyika maeneo ya mjini pekee.
Alisema, ugonjwa wa kifua kikuu upo kila mahali,lakini maeneo ya vijijini kuna watu wengi wenye ugonjwa wa kifua kikuu kutokana na kuishi kwenye makazi holela na yasio bora, yenye mzunguko mdogo wa hewa na msongamano wa watu wengi.
Alisema,kuna wagonjwa wanaoteseka na ugonjwa huo,lakini wanashindwa kujitokeza kupima afya zao na kuanza matibabu kwa kutopata elimu sahihi na wengine kutokana na umaskini.
Aidha alisema,kampeni hiyo ikifanyika mara kwa mara itawezesha kuibua wagonjwa wengi wa kifua kikuu ambao wako majumbani wakiteseka na hawajui wafanye nini na waende wapi kwa ajili ya kupata majibu ya shida zao.
Kwa mujibu wake, msaada pekeekwa watu hao ni serikali kupitia wataalam wake kufika katika maeneo hayo kwa ajili ya kufanya uchunguzi na kuwaanzishia matibabu.
Adela Mbawala mkazi wa mtaa wa Bethelehem Mbinga mjini, ameishukuru serikali kupeleka huduma hiyo katika makazi yao kwani imetoa fursa kwa watu wengi kufanya uchunguzi wa afya zao na wale wenye matatizo kuanza matibabu.
Mratibu wa kifua Kikuu Halmashauri ya Mji Mbinga Dkt Wenceslaus Socky alisema, jumla ya watu 129 walifikiwa na huduma ya uchunguzi wa kifua kikuu kwa kutumia kliniki tembezi chini ya ufadhili wa Shirika lisilo la Kiserikali la MDH-Amref Health Africa.
Socky alisema, kati yao 14 wamekutwa na maambuizi ya ugonjwa huo na wameanzishiwa Dawa ambapo ameishukuru serikali kupitia wizara ya afya na wadau waliofanikisha kampeni ya uchunguzi wa kifua kikuu kwa wakazi wa mji wa Mbinga.
Kwa mujibu wa Dkt Socky,mwaka 2022 lengo ni kuibua wagonjwa 327,hata hivyo changamoto kubwa katika mapambano dhidi ya ugonjwa wa kifua kikuu ni uhaba wa vitendea kazi,miundombinu mibovu ya barabara hasa kipindi cha masika.
Dkt Socky alitaja changamoto nyingine ni pamoja na Halmashauri kutoweka kwenye bajeti ya mgao wa Global Fund kwa shughuli za kifua kikuu na ukoma.
Aidha alisema,katika kampeni hiyo iliyofanyika kwa siku mbili katika mtaa wa Bethelehem na kijiji cha Tanga ilikwenda sambamba na upimaji wa virusi vya ukimwi ambapo jumla ya watu 23 waliojitokeza,na 2 walikutwa na virusi vya ugonjwa huo.
Alisema,mwaka jana lengo lilikuwa kuibua wagonjwa wa kikuu 255,lakini walivuka lengo kwa kuibuwa wagonjwa 288 kati yao watu wazima walikuwa 274 na watoto walio chini ya miaka mitano 14 ambapo watu 6 walipoteza maisha.
MWISHO.
