Kamishna wa Kazi Ofisi ya Waziri Mkuu Kazi, Vijana, Ajira na Wenye Ulemavu Suzan Mkagwa akifungua semina ya siku mbili tarehe 4-5 Oktoba, 2024 ya Sheria za kazi kwa wadau wa sekta ya ulinzi nchini katika ukumbi wa karemjee hall jijini Dar es Salaam.
Kamishna wa Kazi Msaidizi Ukaguzi, Ofisi ya Waziri Mkuu Kazi, Vijana, Ajira na Wenye Ulemavu Rehema Moyo akitoa elimu ya utekelezaji wa sheria kwa wadau wa sekta ya ulinzi binafsi nchini katika ukumbi wa Karemjee hall Jijini Dar es salaam katika semina ya mafunzo ya sheria za kazi kwa wadau wa ulinzi binafsi nchini.
Baadhi ya washiriki wakifuatilia semina ya mafunzo ya sheria za kazi iliyotolewa na Ofisi ya Waziri Mkuu Kazi, Vijana , Ajira na Wenye Ulemavu kupitia idara ya kazi
Kamishna wa Kazi Msaidizi Vibali vya kazi Ofisi ya Waziri Mkuu Kazi, Vijana, Ajira na Wenye Ulemavu Lilian Francis akitoa elimu juu ya mada ya utekelezaji wa sheria kwa wadau wa sekta ya ulinzi binafsi nchini katika ukumbi wa Karemjee hall Jijini Dar es salaam.
Na: Mwandishi wetu, Dar es salaam
Ofisi ya Waziri Mkuu – Kazi, Vijana, Ajira na Wenye Ulemavu kupitia Idara ya Kazi, imetoa elimu ya sheria za kazi kwa Wafanyakazi na Waajiri wa sekta za ulinzi Jijini Dar es salaam.
Akizungumza Kamishna wa Kazi, Suzan Mkangwa amesema kuwa dhumuni la semina hiyo ni kutoa Elimu ya Sheria za Kazi katika Sekta ya Ulinzi nchini ili kuendelea kupunguza changamoto zinazowakabili baadhi ya Wafanyakazi katika kampuni wanazofanya kazi.
Aidha, Mkangwa amebainisha baadhi ya malalamiko ambayo yamekuwa yakiripotiwa ofisini kwake ikiwemo wafanyakazi kuajiriwa bila mikataba, Waajiri kutowasilisha michango katika Mifuko ya Hifadhi ya Jamii na kuachishwa kazi kiholela bila kuzingatia sheria za kazi.
“Ni matumaini yangu semina hii itakwenda kuondoa changamoto za ukiukwaji wa sheria za kazi ambazo zimekuwa zikiripotiwa ofisini mara kwa mara” amesema.
Awali akizungumza Afisa Matekelezo kutoka Mfuko wa Fidia kwa Wafanyakazi (WCF) Asha Udindo ametoa rai kwa Waajiri wa sekta hizo kujiunga WCF na kuwasilisha michango kwa wakati ili kulinda haki zao dhidi ya majanga yanayoweza kuwapata wafanyakazi wao wanapokuwa wakitekeleza majukumu yao ya kila siku.
Naye, Meneja Mfuko wa Taifa wa Hifadhi ya Jamii (NSSF) Mkoa wa Dar es salaam Feruzi Mtika amesema Serikali haitawavumilia waajiri wote wa sekta binafsi ambao wanakata michango ya wafanyakazi wao bila kuiwasilisha katika Mfuko huo.
MWISHO
