Na: Mwandishi Wetu
Mamlaka ya Mawasiliano Tanzania (TCRA) imetoa fursa kwa vijana wabunifu katika Teknolojia, Habari na Mawasiliano (TEHAMA) kwa kuwawezesha kutimiza malengo na matamanio yao katika ubunifu hapa nchini.
TCRA kwa ushirikiano na taasisi nyingine imeweka mazingira rafiki kwa vijana wabunifu wa TEHAMA kutengeneza fursa za kukuza ubunifu na hatimaye kuzaa ajira kwa vijana.
Fursa zilizotolewa zinahitaji kijana kuwa na ubunifu kama mtaji wake na vifaa vya gharama nafuu vya TEHAMA kama vile kompyuta mpakato na simu ya kiganjani au vifaa rununu pendwa kama vile kishikwambi kukamilisha ubunifu wake.
Mkurugenzi Mkuu wa TCRA, Dk. Jabir Bakari amesema Serikali ya Tanzania imeamua kutoka rasilimali kwa vijana wabunifu katika sekta ya TEHAMA. Rasilimali za mawasiliano zinazotolewa na TCRA kwa ajili ya vijana wabunifu kufanya majaribio ni pamoja na misimbo ya USSD, yaani rasilimali-namba.
“Hizi ni namba maalum zinazotumika kumpa mbunifu fursa ya kusambaza teknolojia aliyoibuni ndani na nje ya nchi. Pia TCRA kwa sasa wanato kikoa (domain) cha dot tz (.tz) na masafa ya mawasiliano” amesema Dkt. Bakari.
Kuanzia mwaka 2021, Mkurugenzi Mkuu wa TCRA, Dk. Jabir, amesisitiza kuwa vijana wabunifu na wavumbuzi wa programu mbalimbali za kidijitali sasa wanaweza kujitokeza kupata rasilimali hizo zitakazowawezesha kupata fursa ya kutengeneza ajira; kujiletea kipato na kutatua changamoto mtambuka za jamii.
“Tumejipanga kuhakikisha wabunifu wapya hasa wa sekta ya TEHAMA wanaoweza kutatua changamoto za jamii yetu wanapata rasilimali hizi za mawasiliano, ili washiriki katika uchumi wa kidijiti,” amesisitiza Mkurugenzi Mkuu Dk. Jabir.
Wameweka utaratibu jinsi ya kusaidia vijana hawa: “Tuna utaratibu wa kutoa rasilimali hizi kwa muda wa miezi mitatu; ambazo tunatoa [kwa mbunifu] baada ya kuidhinishwa na Tume ya Sayansi na Teknolojia ambayo hujiridhisha kubaini kama wazo la kibunifu linakidhi kufanyiwa majaribio na hapo ndipo tunatoa rasilimali za masafa au misimbo ya namba fupi kwa muda wa majaribio wa miezi mitatu,” amebainisha Dk. Jabiri.
Wabunifu wanaotaka kutumia fursa hii wanaweza kuwasiliana na Dawati la Huduma la TCRA kupitia namba 0800008272 au kutembelea tovuti www.tcra.go.tz
Ni wazi kwamba gharama ya rasilimali za Mawasiliano ni kubwa, kiasi kwamba mbunifu au mjasiriamali wa TEHAMA anaechipukia, mathalani mwanafunzi aliyehitimu au aliyepo kwenye mafunzoni, anapohitaji kufanya majaribio ya ubunifu wake wa TEHAMA hataweza kumudu gharama za rasilimali hizo kama vile masafa, kikoa au rasilimali namba, maarufu kama misimbo ya USSD au wengine huita misimbo ya namba fupi.
Kwa kutambua kwamba wabunifu chipukizi wa TEHAMA wanahitaji rasilimali hizo TCRA kupitia Mkurugenzi Mkuu wake, Dk. Jabir imekuwa ikisimamia na kuhakikisha kwamba wabunifu wanapata rasilimali hizo.
Mamlaka ya Mawasiliano Tanzania, ina jukumu la kukuza ubunifu katika TEHAMA kwa nia ya kukuza uchumi za kidigiti. Sekta ya mawasiliano ni sekta-wezeshi ya sekta nyingine muhimu kwenye uchumi wa nchi kama vile, usafirishaji, nishati, afya, elimu, viwanda, kilimo na huduma mbalimbali kama huduma za kifedha.
Moja ya Malengo ya Kimkakati ya TCRA ni Kukuza Ubunifu, uzalishaji wa maudhui ya ndani na ujanibishaji (localization).
Mamlaka ya Mawasiliano Tanzania imeondoa malipo ya ada ya maombi na usajili wa leseni wa rasilimali hizo kwa ajili ya wabunifu wenye nia ya kubuni suala lolote litakalorahisisha mazingira ya kawaida ya kila siku ya mwananchi.
Pia, watoa huduma za mawasiliano ya simu kwa kuwaunganisha wabunifu hawa bure kwenye mitandao yao wakati wa kipindi cha majaribio.
