Kaimu Mkurugenzi Mtendaji wa STAMICO Dkt. Vennance Mwasse (kulia) akizungumza mbele ya waandishi wa habari (hawamo pichani) kabla ya utiaji saini wa Makubaliano hayo. (kushoto) ni Mwakilishi wa Benki ya KCB, Mkuu wa Kitengo cha Huduma za Kiislamu wa Benki hiyo (Islamic Banking) Amour Muro. PICHA NA: HUGHES DUGILO.
Mwakilishi wa Benki ya KCB, Mkuu wa Kitengo cha Huduma za Kiislamu wa Benki hiyo (Islamic Banking) Amour Muro akizungumza kwenye hafla hiyo. PICHA NA: HUGHES DUGILO.
Mwanasheria wa Benki ya KCB Antonia Kilama (kulia) akiwa na Afisa mwenzake wa Benki hiyo wakifuatia hotuba ya Mkuu wa Kitengo cha Huduma za Kiislamu wa Benki hiyo (Islamic Banking) Amour Muro (hayumo pichani) wakati wa hafla hiyo. PICHA NA: HUGHES DUGILO.
Na: Hughes Dugilo, DAR ES SALAAM.
Shirika la Madini la Taifa (STAMICO) na Benki ya KCB wameingia makubaliano yanayolenga kushirikiana katika kutoa mikopo ya kuwawezesha wachimbaji wadogo kupata mikopo endelevu na kwa rahisi zaidi ili waweze kufanya shughuli za uchimbaji zenye tija.
Makubaliano hayo yamefikiwa baada ya kusaini Hati ya makubaliano (MOU) baina ya pande hizo mbili leo Novemba 16, 2021 katika Ofisi za STAMICO Jijini Dar es Salaam.
Akizungumza wakati wa utiaji saiini Makubaliano hayo, Kaimu Mkurugenzi Mtendaji wa STAMICO Dkt. Vennance Mwasse amesema kuwa Malengo ya makubaliano hayo ni kushirikiana na Taasisi za fedha katika kuwasaidia wachimbaji wadogo kupata mikopo endelevu na yenye tija.
“Katika Makubaliano haya STAMICO itawajibika kutoa utaalam elekezi katika maeneo ya Jiolojia, Uchimbaji na Uchenjuaji Madini kwa miradi ya Wachimbaji Wadogo ambayo itafanya maombi ya mikopo na kuiwasilisha kwa Benki kabla ya utekelezaji wake na Benki ya KCB itawajibika kutoa mikopo kwa Wachimbaji Wadogo ambao watawasilisha maombi ya mikopo katika maeneo ya miradi ya uchimbaji madini itakayokidhi vigezo vya kupewa mikopo.Amesema Dkt. Mwasse.
Ameongeza kuwa Makubaliano hayo yatadumu kwa muda wa miaka mitatu (3) kuanzia mwaka huu wa 2021 ambapo pia yanaweza kufanyiwa mapitio kila baada ya mwaka mmoja (1).
Kwa upande wake Mwakilishi wa Benki ya KCB, Mkuu wa Kitengo cha Huduma za Kiislamu (Islamic Banking) Amour Muro amesema kuwa Benki hiyo imekuwa ikitoa Huduma ya mikopo mbalimbali isiyokuwa na riba nakwamba wachimbaji wadogo wanakaribishwa kupata mikopo hiyo hata kwa wale ambao sio waislamu.
“Mpaka sasa Benki yetu tayari imeshatoa mikopo yenye thamani ya Shilingi Bilioni 4 kwa wateja wetu wote na sasa tupo tayari kuwafikia wachimbaji wadogo kwa kuwakopesa ili waweze kufanya shughuli zao” Amesema Amour.
STAMICO imendelea kutekeleza mikakati yake ya kuendeleza shughuli za uchimbaji mdogo nchini ili uwe wenye tija na kuchangia ipasavyo uchumi wa nchi ikiwa ndio Mlezi wa Wachimbaji Wadogo hapa nchini.
